Cwricwlwm

Cydweithio Trawsclwstwr

Mae’r ysgol yn cydweithio’n agos gyda pob un o’r ysglion clwstwr er mwyn sichrau bod y dysgwyr yn dilyn cwricwlwm cydlynus ac adeiladol drwy gydol eu gyrfa addysgiadol.
Gyda’n gilydd rydym yn dilyn y gweledigaeth isod:

Cluster Transition Plan 2025-26

Sail Resymegol y Cwricwlwm

Mae cwricwlwm Ysgol Gyfun Gymraeg Llangynwyd yn un eang, cytbwys a chynhwysol sydd wedi ei ddylunio er mwyn cefnogi pob dysgwr i wneud cynnydd priodol yn unol â’u gallu. Mae’n gwricwlwm uchelgeisiol a chreadigol sy’n datblygu dysgwyr iachus a mentrus gan feithrin sgiliau a gwybodaeth angenrheidiol i ganiatáu unigolion hyderus ar hyd eu llwybr dysgu a thu hwnt.

Diben y Cwricwlwm

  • Darparu cwricwlwm eang a chytbwys sy’n meithrin dysgwyr uchelgeisiol, galluog sy’n barod i ddysgu gydol eu bywydau
  • Darparu profiadau, gwybodaeth a sgiliau sy’n hyrwyddo dysgwyr fel cyfranwyr mentrus, creadigol sy’n barod i chwarae rhan lawn mewn bywyd a gwaith
  • Darparu ystod o gyfleoedd y tu fewn a thu allan i’r ystafell ddosbarth sy’n cyfoethogi’r dysgu ac yn annog dinasyddion egwyddorol, gwybodus yng Nghymru a’r byd
  • Cwrdd ag anghenion bob dysgwr er mwyn annog unigolion iach, hyderus a gwydn sy’n barod i fyw bywyd cyflawn fel aelodau gwerthfawr o gymdeithas
  • Sicrhau bod dysgwyr yn cael profiad o astudio ystod o bynciau yng nghyfnod allweddol 3 yn ogystal â’r pynciau craidd gan ddiwallu gofynion pob maes dysgu a phrofiad a chadw pob llwybr gyrfa neu astudiaethau pellach yn agored iddynt

Mae cwricwlwm Ysgol Gyfun Gymraeg Llangynwyd yn caniatáu i ddysgwyr ddatblygu:

  • agwedd cadarnhaol ac ymrwymiad at ddysgu
  • y gallu i ganfod, gwerthuso a defnyddio tystiolaeth wrth ffurfio barn a thrafod materion cyfoes ar sail eu gwybodaeth a’u gwerthoedd
  • gwybodaeth, sgiliau a dealltwriaeth sy’n berthnasol i fywyd a chyflogaeth mewn byd sy’n esblygu’n barhaus
  • sgiliau trawsgwricwlaidd; llythrennedd, rhifedd a llythrennedd digidol
  • sgiliau cyfannol megis creadigrwydd, meddwl yn feirniadol a datrys problemau, effeithiolrwydd personol a chynllunio a threfnu
  • cydnabyddiaeth o’u cryfderau a’u doniau ynghyd â gwerthfawrogi llwyddiannau eraill
  • ymdeimlad o gyfrifoldeb dros eu cynnydd drwy adnabod ac ymateb i’r agweddau i’w gwella
  • y gallu i weithio’n annibynnol a chyd-weithio’n hyderus fel aelod o dîm
  • hunan hyder, hunan werth a’r dealltwriaeth am hawliau dynol ac amrywiaeth

Gweithredu’r Cwricwlwm

Mae gan bob adran gynllun gwaith sy’n seiliedig ar y continwwm clwstwr, y Cwricwlwm Cenedlaethol a gofynion y byrddau arholi. Disgwylir i bob aelod o staff o fewn adran ddilyn y cynllun gwaith ac mae’r Arweinydd Adran yn monitro ddarpariaeth drwy’r prosesau hunan arfarnu. Mae’r cynlluniau gwaith wedi ei strwythuro er mwyn amlygu’r sgiliau, gwybodaeth a dealltwriaeth sydd angen ei ddatblygu dros amser.
Sicrheir fod yna gydbwysedd rhwng arbenigedd a phrofiad athrawon ar draws yr amrediad oed a gallu a fod pob athro yn gymwys i ddysgu trwy gyfwng y Gymraeg (ac eithrio pwnc Saesneg). Mae’r athrawon yn cyd-gynllunio er mwyn sicrhau dealltwriaeth cadarn o sut mae cyflwyno’r cynllun gwaith ar draws cyfres cydlynol o wersi ac er mwyn adnabod cysylltiadau dilys boed o fewn yr adran, maes neu thu hwnt.
Cynllunnir tasgau annibynnol priodol sy’n rhoi cyfle i ddysgwyr meithrin y sgiliau a gyflwynir o fewn gwersi ynghyd â cyfoethogi eu dealltwriaeth. Rhoddir amser digonol i ddysgwyr gwblhau’r gwaith hwn ynghyd â cyfle i dderbyn cefnogaeth pellach yn ôl yr angen.
Caiff dysgwyr sydd â gofynion mynediad neu anghenion dysgu ychwanegol (ADY) eu cynorthwyo o fewn gwersi o dan arweiniad yr adran gynnal lle’n briodol. Addysgir o fewn dosbarthiadau gallu cymysg ar ddechrau eu gyrfa ysgol ac mae’r dosbarthiadau yma yn parhau mewn nifer o bynciau.
Mae’r cwricwlwm yn cael ei fireinio’n gyson er mwyn sicrhau ei fod yn parhau i ddiwallu anghenion ein dysgwyr. Mae’r athrawon yn cydweithio er mwyn gwerthuso’r ddarpariaeth presennol ac mae ystod o brosesau monitro ac arfarnu yn cael eu defnyddio’n gyson. Mae llais y dysgwyr yn holl bwysig a cynhelir holiaduron a grwpiau ffocws ar lefel adran ac ysgol gyfan drwy gydol y flwyddyn. Croesawir mewnbwn gan rhanddeiliaid hefyd gan gynnwys ein clwstwr a’n rhieni.

Cwricwlwm Academaidd

Ym mlynyddoedd 7, 8 a 9 cynigir cwricwlwm eang a chyfoethog sydd wedi ei ddylunio yn unol â gofynion Cwricwlwm i Gymru. Mae’n rhoi cyfle i ddysgwyr astudio disgyblaethau ar draws y chwe maes dysgu a phrofiad gan ddatblygu sylfaen addysgol cadarn wrth baratoi ar gyfer astudiaethau ym mlwyddyn 10. O ganlyniad, mae modd i ddysgwyr wneud penderfyniadau gwybodus wrth ddewis opsiynau TGAU ar ddiwedd blwyddyn 9. Lle’n briodol cynigir cwricwlwm addasedig i ddysgwyr TyDerwen er mwyn diwallu eu hanghenion addysgiadol.
Cefnogir dysgwyr wrth iddynt wneud dewisiadau ôl 14 ac ôl 16 trwy ddiwrnodau gyrfau, gwefan bontio ynghyd â chyfarfodydd gyda’r tîm bugeiliol. Cynhelir awdit dewis rhydd blynyddol er mwyn llunio colofnau sydd yn diwallu anghenion y dysgwyr presennol orau. Cydnabyddir bod cynnig pob pwnc opsiynol ym mlwyddyn 10 yn ddibynnol ar niferoedd hyfyw.

Mae Chweched dosbarth Llangynwyd yn cynnig ystod eang a chytbwys o gymwysterau Lefel A a galwedigaethol sydd yn diwallu anghenion ein dysgwyr. Mae’r cynnig blynyddol yn ddibynnol ar ddewis rhydd dysgwyr blwyddyn 11. Er bod yr ysgol yn ceisio ymateb i ddyheadau pob dysgwr, mae cynnig pynciau yn ddibynnol ar niferoedd hyfyw. Yn ogystal â tri pwnc opsiynol, mae’n ofynnol i bob dysgwyr astudio’r Tystysgrif Her Sgiliau tra yn y Chweched. Mae’r ysgol hefyd yn cynnig rhaglen llawn amser Lefel 3 Gofal Plant lle mae’r dysgwr yn cwblhau gwersi theori yn yr ysgol a’r agwedd ymarferol tra ar leoliad blynyddoedd cynnar.

Cwricwlwm Ehangach

Yn ogystal â datblygiad academaidd yr unigolyn mae’r cwricwlwm yn hyrwyddo datblygiad personol holistaidd a chyflawn ac yn cydnabod y fframweithiau mandadol ychwanegol a gyflwynir yn y ddeddfwriaeth.

Dimensiwn Cymreig a’r Iaith Gymraeg: Fel unig ysgol cyfrwng Cymraeg y sir mae’r ysgol yn ymfalchïo yn ei allu i ddarparu cwricwlwm eang a chytbwys drwy’r Gymraeg i’n dysgwyr o flwyddyn 7 hyd at 13. Drwy gynnig profiadau o ddiwylliannau Cymraeg a byd-eang rhoddir cyfle i’r dysgwyr feithrin hunaniaeth bersonol a gwerthfawrogiad o’r gymdeithas aml-ddiwylliannol fodern gan adnabod manteision dwy-ieithrwydd o fewn y gymdeithas honno. Mae’r ysgol yn ymwybodol bod yr ymdeimlad cryf o berthyn o gymorth i greu teimladau positif o gysylltiad rhwng ein dysgwyr, cymuned yr ysgol, eu hardal leol, Cymru ac i’r byd ehangach.

Rhaglen fugeiliol: Darperir rhaglen fugeiliol drwy gyfnodau tiwtor, gwasanaethau, diwrnodau her a defnydd asiantaethau allanol lle’n briodol.

Cwricwlwm estynedig: Cynigir ystod eang o gyfleon i ddysgwyr o fewn a thu hwnt i’r gwersi dydd i ddydd. Mae’r cwricwlwm ysgol ynghyd â’r partneriaethau gref mae’r ysgol wedi’u sefydlu gydag amryw o asiantaethau allanol yn darparu profiadau cadarnhaol, cyfoethog a chofiadwy i’n dysgwyr er mwyn meithrin cymhelliant a dyfnhau dealltwriaeth. Cynigir amryw o gyfleon allgyrsiol i ddysgwyr drwy weithgareddau, cystadlaethau, ymweliadau a theithiau preswyl.

Addysg gyrfaoedd a phrofiadau sy’n gysylltiedig byd gwaith: Darperir rhaglen addysg gyrfau a menter ar draws yr ysgol o fewn gwersi yn ogystal thrwy diwrnodau her yn ystod y flwyddyn. Mae swyddog gyrfau yn yr ysgol dwy waith yr wythnos er mwyn cynnig cyngor a chefnogaeth effeithlon a ddi-duedd i ddysgwyr. Mae’r swyddog gyrfau yn darparu cyfweliadau yn benodol i ddysgwyr CA4 a 5 yn ogystal cynnig sesiynau i ddysgwyr CA3 yn ystod diwrnodau her yn ôl lle’n berthnasol. Rhoddir cefnogaeth ychwanegol i unigolion yn unol â’u hanghenion lle’n briodol. Bwriad yr ysgol yw cynnig wythnos profiad gwaith i bob dysgwr ym mlwyddyn 10 ac 12.

Addysg cydberthynas a rhywioldeb: Defnyddir Cod Addysg Cydberthynas a Rhywioldeb Cwricwlwm i Gymru (Ionawr 2022) wrth gynllunio’r rhaglen addysg cydberthynas a rhywioldeb ar draws yr ysgol. Mae’r Cod hwn yn cynnwys gofynion gorfodol ar gyfer blwyddyn 7 yn unig o Fedi 2022, ac mae’r sail gyfreithiol ar gyfer y gofynion hyn i’w gweld yn y crynodeb deddfwriaethol yn y canllawiau fframwaith hyn ar y Cwricwlwm i Gymru. Y nod yw cynorthwyo dysgwyr i feithrin y sgiliau a’r wybodaeth sy’n briodol i’w hoedran a’u dealltwriaeth a’u galluogi i wneud penderfyniadau cyfrifol ynglŷn â’u perthnasoedd, emosiynau a iechyd a lles rhywiol. Darperir yr addysg cydberthynas a rhywioldeb drwy ddiwrnodau her ynghyd â drwy’r cwricwlwm craidd lle’n berthnasol gan ystyried amrywiaeth o ffactorau gan gynnwys gwybodaeth ac aeddfedrwydd y dysgwr, ei ddatblygiad ffisiolegol ac emosiynol yn ogystal ag unrhyw anghenion dysgu ychwanegol.

Crefydd, gwerthoedd a moeseg: Fel agwedd statudol Cwricwlwm i Gymru, mae’r elfen hwn yn orfodol i bob dysgwr hyd at 16 oed. Mae’n canolbwyntio ar ddeall credoau crefyddol ac anghrefyddol, arferion, gwerthoedd ac athroniaeth foesol, ac yn archwilio’n wrthrychol i safbwyntiau crefyddol ac anghrefyddol a’u cysylltiad â gwerthoedd personol er mwyn gwneud penderfyniadau moesol. Ei nod yw meithrin agwedd agored a pharch tuag at amrywiaeth o gredoau, gan helpu dysgwyr i ddatblygu eu sgiliau meddwl yn feirniadol a gwneud ymatebion gwybodus i heriau cymdeithasol a thechnolegol mewn byd sy’n newid yn gyson.

Nodweddion y Cwricwlwm

  • Amserlen tair wythnos gyda 6 gwers 50 munud bob dydd
  • Cyfnod clybiau gwers olaf dydd Gwener ar gyfer dysgwyr 7 – 9 sy’n cael ei arwain gan fl.12
  • Cyfnod llwybrau ôl 18 gwers olaf dydd Gwener ar gyfer dysgwyr blwyddyn 13
  • Hyd at 5 diwrnod her ar draws y flwyddyn
  • Wythnos sgiliau yn ystod tymor yr Haf
  • Wythnos o brofiad gwaith ym mlwyddyn 12